The Twa Corbies

By: Traditional

Verse 1

As I was walking all alane, I heard twa corbies making a mane: The tane unto the tither did say, Whar sall we gang and dine the day?'

Verse 2

In behint yon auld fail dyke I wot there lies a new-slain knight; And naebody kens that he lies there But his hawk, his hound, and his lady fair.

Verse 3

His hound is to the hunting gane, His hawk to fetch the wild-fowl hame, His lady's ta'en anither mate, So we may mak' our dinner sweet.

Verse 4

Ye'll sit on his white hause-bane, And I'll pike out his bonny blue e'en: Wi' ae lock o' his gowden hair We'll theek our nest when it grows bare.

Verse 5

Mony a one for him maks mane, But nane sall ken whar he is gane: O'er his white banes, when they are bare, The wind sall blaw for evermair.